ချစ်လှစွာသောမြန်မာစတီးမစ်မိသားစုဝင် အပေါင်းတို့ မင်္ဂလာပါခင်ဗျာ။

Mingalar par. My dear Myanmar steemians families.

ခုရက်ပိုင်း အရှုတ်တွေလုပ်ပြီး အလုပ်တွေရှုတ်နေလို့ စာမရေးတင်ဖြစ်ခဲ့ဘူး။ ဒီနေ့တော့ မဖြစ်ဖြစ်အောင်ရေးတင်လိုက်ပါတယ်။ အောင်မြင်ကြီးပွားရေးအတွက် မရှိမဖြစ်အခြေခံကျတဲ့အကြောင်းအရာကို ရေးလိုက်ပါတယ်။ ကျွန်တော်တို့မြန်မာလူမျိုးများအတွက် အောင်မြင်စေဖို့ တိုးတက်စေဖို့ ကြီးပွားစေဖို့ဆိုရင် ကံ ဥာဏ် ၀ီရိယ ဆိုတဲ့ စကားလုံးတွေကို မေ့ပျောက်ထားလို့ မဖြစ်ပါဘူး။ ကံ ဥာဏ် ၀ီရိယဆိုတဲ့အရာသုံးပါးက အခြားသော နိုင်ငံများမှာ ရှိတယ် မရှိဘူးဆိုတာ ကျွန်တော့်အနေနဲ့ လက်လှမ်းမမှီလို့ မသိပါ။ မြန်မာနိုင်ငံအနေနဲ့တော့ ကံ ဥာဏ် ၀ီရိယဆိုတာကိုတော့ လက်လွတ်လို့မဖြစ်သလို မေ့ပျောက်ထားလို့တော့ မဖြစ်ပါဘူး။ ဘာကြောင့်လဲဆို တော့ မြတ်ဘုရားကိုယ်တိုင်က အဲဒီအရေးသုံးပါးဟာ လူတို့ရဲ့ ကြီးပွား ချမ်းသာမှုရဲ့ အခြေခံ ပဓာနတရားတွေ ဖြစ်တယ်လို့ ဟောကြားခဲ့လို့ပါပဲ။ ကလေးသူငယ်တွေကို လူကြီးမိဘတွေက ဆိုဆုံးမတိုင်းလည်း ကံ ဥာဏ် ၀ီရိယ အရေးသုံးပါးအကြောင်းကို ပြောပြဆုံးမတတ်ခဲ့ကြပါတယ်(ယခုခေတ် လူကြီးမိဘများအနေနဲ့ ထိုသို့ ပြောဆို ဆုံးမခြင်း ရှိ မရှိကိုလည်း ကျွန်တော်မသိပါ) ကံ ဥာဏ် ၀ီရိယဆိုတာတွေကို ယနေ့ခေတ်လူများအနေနဲ့ လက်ခံနိုင်မှုလည်း နည်းပါးလာသလို ပစ်ပယ်မှုလည်း များပြားလာတယ်လို့ ထင်မိပါတယ်။ ထိုအရာသုံးပါးသည် ခေတ်မမီတာကြောင့် လျစ်လျူရှုပစ်လိုက်ကြခြင်းပင် ဖြစ်နေပါသလား ဆိုတာကို ဝေဖန် ဆန်းစစ်လိုတဲ့အတွက် ယခုစာအား ရေးသားဖြစ်ခြင်းလည်း ဖြစ်ပါတယ်။ ရှေးရှေးတုံးက မှန်ကန်ခဲ့ပြီး ယခုခေတ် နောင်ခေတ်မှာ မမှန်ကန်တော့တာလားဆိုတာကို ဆန်းစစ်ကြည့်လိုသောဆန္ဒကြောင့်တစ်ကြောင်း၊ အခြားသူများရဲ့ ထင်မြင် ယူဆချက်တွေကို သိလိုတဲ့အတွက်တစ်ကြောင်း ရေးသားလိုက်ပါတယ်။ ထင်သမျှ မြင်သမျှ အယူအဆတို့အား လွတ်လပ်စွာ ငြင်းခုံ သဘောထားကွဲလွဲနိုင်ပါတယ်။ ကျွန်တော်ရေးမှာကလည်း ကျွန်တော့်ရဲ့ ထင်မြင်ယူဆချက် သာဖြစ်ပြီးတော့ မှန်တယ်လို့ အာမခံနိုင်မှာ မဟုတ်လို့ပါ။ ဒါပေမယ့်လည်း ကျွန်တော်ကတော့ မြတ်စွာဘုရား ဟောကြားထားခဲ့တာ မှန်တယ်ဆိုရင် ဒီအရေးသုံးပါးလည်း မှန်လိမ့်မယ်လို့ ယုံကြည်ထားပါတယ်။ ဒါက ကျွန်တော့်အယူအဆ ယုံကြည်ချက်တစ်ခုသာဖြစ်ပါတယ်။ ချစ်မိတ်ဆွေတို့အနေနဲ့ ယုံချင်ယုံပါ၊ မယုံချင်လည်း နေနိုင်ပါတယ်။ ဒါကတော့ ကိုယ့်ရဲ့စိတ်ကြိုက်သာလုပ်ကြပါ။

ကံ ဆိုတဲ့အကြောင်းတရားမှာ ရှေးလွန်လေခဲ့ပြီးသော အတိတ်ကာလဘ၀များကို ကျွန်တော်တို့လို သာမန်လူ တွေအနေနဲ့ကတော့ ဘယ်လိုမှ မသိနိုင်တဲ့အရာတစ်ခုဖြစ်ပါတယ်။ ယနေ့ ချမ်းသာနေသူတွေ၊ ဆင်းရဲနေသူတွေ ဟာ အဲဒီမမြင်နိုင်တဲ့ အတိတ်ကံတွေကြောင့်မဟုတ်ပဲ လက်ရှိမှာ ဘာတွေလုပ်နေသလဲဆိုတဲ့ အကြောင်းပေါ် မှာပဲ အဓိကအနေနဲ့ မူတည်နေပါတယ်။ အတိတ်ကံက အကျိုးမပေးနိုင်ဘူးလို့ဆိုချင်တာမဟုတ်ပါဘူး။ အမြဲတမ်း အတိတ်ကံကိုအားကိုးနေလို့မဖြစ်တာကို ပြောလိုတာပါ။ လူတစ်ဦးတစ်ယောက်ရဲ့ ဆင်းရဲခြင်း၊ ချမ်းသာခြင်းဆိုတာတွေက မမြင်ရတဲ့ အတိတ်ကံအပေါ်မှာ လုံးဝ မူတည်နေတယ်လို့ မယူဆသင့်သလို အတိတ်ကံကအကျိုးပေးကို စောင့်မျှော်နေလို့လည်း မဖြစ်နိုင်ပါ။ ကံကိုသာအားကိုးယုံကြည်ပြီး အခြားသော ဥာဏ် နဲ့ ၀ီရိယကို ပစ်ပယ်ထားခြင်းဖြင့် အောင်မြင်မှု ရရှိရန်မလွယ်ကူပါ။ ကံကိုသာအားကိုးရသောအလုပ်များ (ဥပမာ-ထီးထိုးခြင်း၊ ချဲထီလောင်းကစားခြင်း)ဖြင့် ကြီးပွားတိုးတက်အောင်မြင်သူ လောကတွင် များများစားစား ရှိလိမ့်မည်မဟုတ်ပါ။ ကံယုံပြီး ဆူးပုံမနင်းနဲ့ဆိုသောစကားအတိုင်းပင် ကံကောင်းတယ်ဆိုတိုင်း ဆူးပေါ်နင်းလျှင် ဆူးမဆူးဘူးလို့ထင်မှတ်ခြင်းဟာ အလွန်မိုက်မဲသော အတွေးအခေါ်သာဖြစ်ပါတယ်။ ကံဆိုတာ မိမိတို့ပြုလုပ် သောအလုပ်လို့ အဓိပ္ပာယ်ရပါတယ်။ ကံသည်သာ ကိုယ်ပိုင်ဥစ္စာဖြစ်တယ်လို့ဆိုခြင်းဟာ မိမိတို့လုပ်တဲ့အလုပ်က ကိုယ်ပိုင်ဥစ္စာသာဖြစ်တာကို နားလည်သင့်ပါတယ်။ ဒီတော့ ကံတစ်ခုတည်းကို ယုံကြည်အားကိုးနေရုံနဲ့တော့ အောင်မြင်ကြီးပွားတိုးတက်ဖို့ မလွယ်ကူနိုင်တာကို သတိပြုစေချင်ပါတယ်။

ဥာဏ်ဆိုတဲ့အကြောင်းတရားကတော့ အဓိကအနေနဲ့ အသိဥာဏ်ပညာကို ဆိုလိုတယ်လို့ထင်ပါတယ်။ အသိဥာဏ်ပညာဆိုတာ ဘ၀ရဲ့ ပဲ့ကိုင်ပဲဖြစ်ပါတယ်။ အသိဥာဏ်ပညာနည်းပါးတဲ့အတွက် လုပ်သင့်၊ မလုပ်သင့်၊ အကောင်း အဆိုး နားမလည်နိုင်ဖြစ်ရတတ်ပါတယ်။ ဒါကြောင့် အသိဥာဏ်ပညာတိုးတက်စေတဲ့အလုပ်တွေကို လေ့ကျင့်သင်ကြားတာတွေ ပြုလုပ်ကြရမှာဖြစ်ပါတယ်။ အများစုသောလူတို့ အသိဥာဏ်ပညာတိုးတက်ရေး၊ အသိဥာဏ်ပညာဖွံ့ဖြိုးရေးကို အတတ်ပညာလောက် ဦးစားမပေးချင်ကြတာကို မြင်တွေ့ရပါတယ်။ အတတ်ပညာ နဲ့ အသိပညာမှာ အသိဥာဏ်ပညာက ဦးဆောင်နေတာပဲဖြစ်ပါတယ်။ အတတ်ပညာတွေများစွာ တတ်မြောက်ထားပေမယ့်လည်း အသိဥာဏ်ပညာနဲ့ မထိန်းချုပ်နိုင်ခဲ့ရင်လည်း ကောင်းကျိုးမရနိုင်ပါဘူး။ ကြီးပွားတိုးတက်အောင်မြင်လိုတဲ့သူတွေအဖို့မှာတော့ အသိဥာဏ်ပညာတိုးတက်ရေးကိုလည်း ဦးစားပေးသင့် တယ်လို့ထင်ပါတယ်။ အသိဥာဏ်ပညာမပါတဲ့ အကြောက်အကန်အားထုတ်မှုတွေက ကောင်းကျိုးမရရှိစေတတ် ပါဘူး။ ဘ၀အောင်မြင်တိုးတက်ရေးအတွက် အသိဥာဏ်ပညာနဲ့ သတိထား၊ စဉ်းစားဆင်ခြင်၊ ကျိုးကြောင်း ဆင်ခြင်မှသာ ပိုမိုလွယ်ကူနိုင်မယ်လို့လည်း ထင်ပါတယ်။ ခုခေတ်ကာလမှာ နေရာအနှံ့အပြား လိမ်လည်လိုသူ တွေ အများအပြားရှိနိုင်ပါတယ်။ လိမ်လည်မှုတွေမခံကြစေဖို့အတွက် အသိဥာဏ်ရှိဖို့ အလွန်အရေးကြီးပါတယ်။ လိမ်လည်သူတွေဟာ လူတွေရဲ့အားနည်းချက်ကို ပိုင်ပိုင်နိုင်နိုင် သိရှိထားသူတွေဖြစ်ပါတယ်။ အသိဥာဏ်နဲ့ မထိန်းချုပ်၊ မဆင်ခြင်နိုင်ခဲ့ရင် အလိမ်ခံရဖို့ ရာနှုန်းများပြားလှပါတယ်။ ဒီတော့ အောင်မြင်လိုတယ်ဆိုရင် မိမိ လုပ်ငန်းနဲ့ ပတ်သက်တဲ့ အတတ်ပညာသာမက အသိဥာဏ်ပညာကိုပါ ဖွံ့ဖြိုးတိုးတက်စေဖို့ ကြိုးစားဆောင်ရွက် သင့်ပါတယ်။

ဝီရိယဆိုတဲ့တရားကတော့ လုပ်ငန်းလုပ်ဆောင်ရာမှာ တက်ကြွမှု၊ ဇွဲရှိမှုကို ဆိုလိုတယ်လို့ ထင်ပါတယ်။ သာမန် လူတန်းစားအဆင့်ကနေ အောင်မြင်လိုသူတစ်ယောက်အနေနဲ့က တော်ရုံ ၀ီရိယနဲ့တော့ မဖြစ်နိုင်ပါ။ မလွယ်ကူ နိုင်ပါ။ စားလိုက် အိပ်လိုက် ဖုန်းပွတ်လိုက်လုပ်နေရုံနဲ့တော့ သူ့အလိုလိုအောင်မြင်လာမယ် မထင်ပါဘူး။ ရိုးရိုးသားသားနဲ့ လောကမှာအောင်မြင်ချင်သူတွေအတွက် ၀ီရိယအားစိုက်မှု ပိုလို့တောင်လိုအပ်မှာဖြစ်ပါတယ်။ ကိုယ်တိုင်က ၀ီရိယမစိုက်ပဲနဲ့ အချောင်လိုက်ချင်နေလို့ မရနိုင်ပါ။ စိတ်ဓာတ်ခွန်အားများလည်း ပြည့်ဝအောင် ဖြည့်ဆည်းထားသင့်ပါတယ်။ အခက်အခဲဆိုတာမျိုးကလည်း ကိုယ့်မှာဖြစ်ပေါ်လာမှ အခက်အခဲလို့ထင်တတ် ကြတာ လူ့သဘာဝပဲဖြစ်ပါလိမ့်မယ်။ အခက်အခဲကို မကျော်ဖြတ်ဖူးတဲ့၊ အခက်အခဲနဲ့ မကြုံဖူးတဲ့ အောင်မြင်နေသူ လောကမှ ရှိမယ်မထင်ပါ။ ဒီနေ့ ကြုံရတဲ့ အခက်အခဲတစ်ခုဟာ နောင်တစ်ချိန်မှာတော့ ရယ်စရာ ဟာသတစ်ခုအနေနဲ့ မှတ်ယူနိုင်ပါလိမ့်မယ်။ အသိပညာ၊ အတတ်ပညာ အရည်အချင်းတိုးတက် လာတာနဲ့အတူ အခက်အခဲဆိုတာတွေကလည်း ပေါ့ပေါ့ပါးပါး ရင်ဆိုင်နိုင်စွမ်းရှိလာတတ်ကြပါတယ်။ ဥပမာ အနေနဲ့ဆိုရင် သူငယ်တန်းတုံးက အခက်အခဲဆိုတာက လေးတန်းရောက်သွားချိန်မှာ အတော်ရယ်စရာကောင်း တာကို မြင်တွေ့ကြရမှာပဲဖြစ်ပါတယ်။ လုပ်ငန်းခွင်တွေမှာလည်း ထို့အတူတူပဲလို့မြင်ပါတယ်။ မကျွမ်းမကျင် ဖြစ်နေတဲ့အချိန်တုံးက အခက်အခဲတစ်ခုဟာ ကျွမ်းကျင်လာတဲ့အချိန်မှာတော့ ရယ်စရာဟာသတစ်ခုသာ ဖြစ်သွားပါလိမ့်မယ်။ ကံ ဥာဏ် ၀ီရိယတို့ကို ပစ်ပယ်ထားပြီး ဘယ်လုပ်ငန်းနယ်ပယ်မှာမှ အောင်မြင်ထွန်းပေါက် နိုင်မှာမဟုတ်ပါကြောင်း ရေးသားအကြံပြုရင်း ရပ်နားလိုက်ပါတယ်။

ရေးသားသူ(Author)___

@ansoe (MSC 012)

Soe Naing

Myanmar Steemit Community

27-Nov-2018 အင်္ဂါနေ့(Tuesday)